ជនដៃដល់កាប់សម្លាប់ក្មេងប្រុស៣នាក់ប្លន់យកម៉ូតូ កាត់ទ្វារមន្ទីរឃុំឃាំងរត់គេចខ្លួន ត្រូវគេតាមចាប់បានមកវិញហើយ
05-January-2016 | ដោយ មួយឡា
សៀមរាប៖ ជនដៃដល់ម្នាក់ដែលបានកាប់សម្លាប់ក្មេងប្រុស ៣នាក់ ប្លន់យកម៉ូតូនៅស្រុកអង្គរជុំ ហើយលួចកាត់សោទ្វារ នៃ មន្ទីរឃុំឃាំងស្នងការដ្ឋាននគរបាលខេត្តសៀមរាបរត់គេចខ្លួននៅម៉ោងទៀបភ្លឺថ្ងៃទី៤ ខែមករា ឆ្នាំ២០១៦ ត្រូវបានប្រជាពលរដ្ឋជួយស្ទាក់ចាប់ប្រគល់ជូនសមត្ថកិច្ចវិញហើយ នៅល្ងាចថ្ងៃដដែលនោះ។
ស្នងការនគរបាលខេត្តសៀមរាប លោកឧត្តមសេនីយ៍ ត្រី សត ណាឌី បានប្រាប់ឲ្យដឹងមុននេះបន្តិចថា ជនសង្ស័យឈ្មោះ ឈន់ ឆេន ដែលកាត់សោទ្វាររត់គេចខ្លួនត្រូវបានប្រជាពលរដ្ឋស្ទាក់ចាប់បានហើយនៅម៉ោង ៦ល្ងាចថ្ងៃ ពេលកំពុងពួននៅគុម្ពចេករបស់ប្រជាពលរដ្ឋ ក្នុងភូមិគោកដូង សង្កាត់ទឹកវិល ក្រុង-ខេត្តសៀមរាប។
សូមបញ្ជាក់ថា ជនដៃដល់ឈ្មោះ ឈន់ ឆេន អាយុ ១៨ឆ្នាំដែលជាជនសង្ស័យកាប់សម្លាប់ក្មេងប្រុស ៣នាក់ ប្លន់ម៉ូតូកាលពីថ្ងៃទី០២ ខែមករា នៅស្រុកអង្គរជុំ ត្រូវបានកម្លាំងនគរបាលចាប់ខ្លួននៅថ្ងៃទី០៣ ខែមករា។ ពេលកំពុងឃុំខ្លួននៅមន្ទីរឃុំឃាំង នៃស្នងការដ្ឋាននគរបាលខេត្តសៀមរាបដើម្បីសួរនាំជនសង្ស័យរូបនេះ ក៏បានលួចកាត់សោទ្វារលួចរត់គេចខ្លួននៅម៉ោង៤ទៀបភ្លឺថ្ងៃទី ០៤ ខែមករា។
សមត្ថកិច្ចបានឲ្យដឹងថា ជនសង្ស័យ ឈន់ ឆេន បានកាប់សម្លាប់ក្មេងប្រុសមិនទាន់គ្រប់អាយុ ៣នាក់ យ៉ាងសាហាវឃោរឃៅ ដើម្បីយកម៉ូតូមួយគ្រឿងម៉ាក C125 ពណ៌ខ្មៅ ស៊េរី២០១១ ពាក់ស្លាកលេខប៉ៃលិន 1A-6878 ស្ថិតក្នុងភូមិគោកដូង ឃុំគោកដូង ស្រុកអង្គរជុំ។
ជនរងគ្រោះទាំង ៣នាក់រួមមាន៖ ទី១-ឈ្មោះ អ៊ាង សូយ ភេទប្រុស អាយុ៨ឆ្នាំនៅភូមិគោកដូងថ្មឹ ឃុំគោកដូង ស្រុកអង្គរជុំ, ទី២-ឈ្មោះ មាឌ យ៉ា ភេទប្រុសអាយុ១៣ឆ្នាំនៅ ភូមិគោកត្របែក ឃុំគោកដូង និង និងទី៣-ឈ្មោះ មិច ក្អាត់ ភេទប្រុសអាយុ១៦ឆ្នាំ នៅភូមិ គោកត្របែក ឃុំគោកដូង ស្រុកអង្គរជុំ៕ ដោយ មែន កំសត់
ចំនួនអ្នកទស្សនា
- ថ្ងៃនេះ14841
- ម្សិលមិញ12561
- សប្តាហ៍នេះ42791
- ខែនេះ64671
- ឆ្នាំនេះ64671
- សរុប20507127